• Мартин Танасковски
Битолската публика не го заборави гестот на капитенот на Вардар, Столе Стоилов. Иако вардарци и Еурофарм Пелистер се големи ривали, пред натпреварот кружниот напаѓач се поздрави со „Чкембарите“ и двете страни имаа момент каков што доликува на спортските терени.
По победата на Еурофарм Пелистер во Скопје, капитенот на вардарци ја почести противничката екипа со гајби пиво. На празникот, први мај, Вардар гостуваше во Битола, а пред натпреварот публиката подготви подарок за Стоилов.
Од „Чкембарите“ во првиот ред, Стоилов доби првомајски колбаси за подарок. Моментот се овековечи со фотографија за спомен. На крајот, Вардар ја однесе победата, го презеде првото место и е во пол-позиција за нова титула во мак-ракометот.
