• Иван Димовски
Фудбалската репрезентација на Македонија со осигурана прва позиција во групата го дочекува последниот натпревар од циклусот во Лигата на нациите против Фарски Острови. Примарната цел е остварена, освојување на групата и пласман во Б дивизијата за следното издание, а со сигурност нашите фудбалери сакаат да ја завршат годината со победа.
На ден пред натпреварот стандардно на прес-конференцијата се обрати селекторот на Македонија, Благоја Милевски.
„Фарски Острови покажаа дека во денешниот фудбал нема аутсајдери и се квалитетен тим. Во овие Лига на нации го играат добро, се работи за дисциплинирана екипа, одговорна и доста силна, тркачки одлично подготвена. Нè очекува уште потежок меч од тој со Летонија во четвртокот. Фокусот ни е на нас самите, како ќе изгледаме на теренот и да го завршиме ова издание на најдобар можен начин. Прашањето за првото место е решено, ама ние си имаме свои мотиви, индивидуални и како тим. Си поставивме уште една цел, со што е можно повеќе бодови да бидеме поконкурентни во завршната ранг-листа.
По последниот меч присутен е замор, со оглед на тоа дека истрчаа доста и одигравме напорна средба. Дополнителен проблем е теренот кој не е во сјајна состојба. Дојдовме до последното скалило и мислам дека момците ќе го дадат последниот атом на силите за да покажат карактер, па со победа да ја затвориме годината. Околу составот, се надевам дека сите ќе останат здрави, па освен Елмас нема да ни недостига никој. Ќе има одредени промени во играта и тимот. Сепак, мора да бидеме потрпеливи од четвртокот, бидејќи се работи за слично поставен противник кој е поагресивен и поорганизиран, кој е поподготвен од Летонија. Сметам дека нè очекува уште потежок натпревар. Како ќе одговориме на притисокот, ќе видиме утре. Максимално сме мотивирани, без разлика на сите математики сите сме мотивирани кога сме дојдени тука за Македонија“, изјави Милевски.
Македонија е домаќин на Фараните в недела во 15:00 часот на „Тодор Проески“. Потребна е победа за што е можно подобар пласман во финалното рангирање од натпреварувањето.
